వాస్తు విజ్ఞానం 12&13

ద్వారాల అమరిక –తీసుకోవలసిన జాగ్రత్తలు.

సూర్యదేవర వేణుగోపాల్  M. A ( జ్యోతిష్యం)

పూర్వకాలంలో నిర్మించే గృహాలకు గృహ మధ్యభాగంలో వచ్చే విధంగా దర్వాజాలను అమర్చేవారు. కానీ నేటి కాలంలో  యే నిర్మాణానికైనా మధ్యలో కాకుండా ఉచ్చ స్థానాలలో దర్వాజాలను అమర్చుతున్నారు. ఈ రెండు పద్దతులు సరైనవే. అయితే ఉచ్చ స్థానాలలో దర్వాజాలు ఉంటే మెరుగైన ఫలితాలు రావడం గమనార్హం. ఏ నిర్మాణానికైనా దర్వాజాలు తప్పనిసరి. యే నిర్మాణానికైనా మంచి స్థానాలలో దర్వాజాలను అమర్చాలి. మంచి స్థానాలలో ఉండే దర్వాజాల వలన మంచి నడక వస్తుంది. మేరుగైన జీవితం ఉంటుంది. చెడు దిశలలో దర్వాజాలను ఉంచినట్లైతే చెడు దిశల గుండా నడక సాగి సమస్యలు వస్తాయి. కనుక దర్వాజాలు అమర్చే సందర్భంలో అనేక జాగ్రత్తలను మనం తీసుకోవాలి.

పాత గృహాలకు దర్వాజాలను ఇంటి మధ్యభాగంలో, గృహ కొలతను సగం చేసి కొంచెం ఉచ్చ స్థానానికి వచ్చే విధంగా దర్వాజాలను అమర్చేవారు. అంటే ప్రధాన దిక్కులందు దర్వాజాలను పెట్టేవారు. దిక్కును 9 భాగాలుగా చేసి, ఈ భాగాలను 9 గ్రహాలకు విభజించి మంచి గ్రహ ఆదిపత్యం లో ఉన్న స్థలంలో సుమారు సెంటర్ నందు దర్వాజ అమర్చే వారు.  పురాతన గృహాలు దాదాపుగా పూరిళ్ళు, నిట్టాడు గృహాలు. ఇటువంటి గృహాలకు గృహ మధ్య భాగంలో దర్వాజా ఉంచితే పై కప్పు బరువును దర్వాజా సమానంగా మోస్తుంది. పై కప్పును సమానంగా మోసే నిమిత్తమై దర్వాజాను మధ్యలో ఉంచేవారు. ఇప్పుడు నిర్మాణ రంగం బాగా వృద్ది చెందింది. అనేక మార్పులు వచ్చాయి. పై కప్పును మోయడానికి పిల్లర్లు,బీమ్ లు ఉన్నాయి. దర్వాజాలను మధ్యలో కాకుండా ఉచ్చ దిశలైన  ఈశాన్యం, పడమర వాయవ్యం, దక్షిణ ఆగ్నేయం లో ఉంచితే మంచి ఫలితాలు వస్తాయి అన్నది నేటి భావన. ఉచ్చ స్థానాలలో దర్వాజాలు ఉంచితే మంచి దిశలగుండా నడక సాగి మెరుగైన జీవితం ఖచ్చితంగా వస్తుంది. కనుక ఉచ్చ దిశలలో ద్వారాలు ఉంచుట మంచిది. ఈ దిశలగుండ నడక సాగినట్లైతే మంచి జీవితం ఉంటుంది అన్నది అనుభవం ద్వారా తెలుసుకొన్న అంశం.

తూర్పు ముఖంగా ఉండే గృహాలకు తూర్పు మరియు తూర్పు ఈశాన్యం నందు దర్వాజాలను ఉంచవచ్చు.  18, 12, లేదా 9 అంగుళాల కట్ట ను ఉంచి తూర్పు ఈశాన్యంలో దర్వాజను అమర్చితే చాలా మంచిది.  ఈ దర్వాజకు ఎదురుగా పశ్చిమ వాయవ్యంలో కూడా దర్వాజాను ఉంచితే చాలా మంచి ఫలితాలు కలుగుతాయి. ఒక వేళ సెంటర్ దర్వాజాను ఉంచాలనుకొంటే గృహ కొలతను సగం చేసే కొంచెం ఉచ్చ దిశ అయిన ఈశాన్యం నకు జరిపి డోర్ ఉంచాలి. అయితే ఇటువంటి సందర్భం లో ద్వారానికి ఇరు వైపులా కిటికీలు తప్పని సరిగా ఉంచాలి. అదే విధంగా దక్షిణ ముఖంగా నిర్మించే గృహానికి తప్పనిసరిగా దక్షిణ ఆగ్నేయంనందు ద్వారం అమర్చాలి. దక్షిణం సెంటర్ లో దర్వాజను అమర్చడం అంతా మంచిది కాదు. దక్షిణ ఆగ్నేయంలో దర్వాజాను ఉంచి దానికి ఎదురుగా ఉత్తర ఈశాన్యం లో ద్వారం అమర్చాలి. ఉత్తరం లో ద్వారం లేకుండా దక్షిణం లో ద్వారం ఉంచకూడదు. పశ్చిమ ముఖ గృహానికి పడమర వాయవ్యం లో దర్వాజ ఉంచాలి. పడమర సెంటర్ లో డోర్ ఉంచకూడదు. పడమర వాయవ్యం లో డోర్ ఉంచి దానికి ఎదురుగా తూర్పు ఈశాన్యం లో డోర్ ఉంచాలి. తూర్పున డోర్ లేకుండా పడమర వైపు డోర్ ఉంచరాదు. ఉత్తర ముఖంగా నిర్మించే గృహానికి ఉత్తర ఈశాన్యం లేదా ఉత్తరం సెంటర్ లో డోర్ ఉంచవచ్చు. ఈ డోర్ కు ఎదురుగా దక్షిణ ఆగ్నేయం లో డోర్ ఉంచుట మంచిది. ఈ డోర్ అమరిక వలన ఆడపిల్లల వివాహాలు త్వరగా తృప్తికరంగా జరుగుతాయి. ఉత్తరం సెంటర్ లో డోర్ ఉంచితే తప్పనిసరిగా డోర్ కు ఇరువైపుల కిటికీలను ఉంచాలి.

ఇంటికి లోపలి భాగం లో గాని వెలుపలి భాగం లో గాని ఇంటికి గాని గదులకు గాని నీచస్థానాలలో ద్వారాలు అమర్చకూడదు. నీచ దిశలైన దక్షిణ నైరుతి,పశ్చిమ నైరుతి, ఉత్తర వాయవ్యం, మరియు తూర్పు ఆగ్నేయం లందు దర్వాజాలు అమర్చకూడదు. ఈ దిశలందు దర్వాజాలు ఉంచి ఈ స్థానాల గుండా నడక సాగడం ప్రమాద హేతువు. అనేక రకాలైన ప్రమాదాలు గృహస్తుకు కలుగుతాయి. కనుక ఉచ్చ స్థానాలైన తూర్పు, ఉత్తర ఈశాన్యం, దక్షిణ ఆగ్నేయం మరియు పడమర వాయవ్యం నందు డోర్లు అమర్చి ఈ దిశలగుండా నడక సాగితే మనిషి జీవితం అబివృద్దిని పొందుతుంది.

ఈ దర్వాజాలను అమర్చే సందర్భంలో చాలా జాగ్రత్తలు తీసుకోవాలి. సింహద్వారం ప్రక్కన తప్పనిసరిగా కిటికీ ఉండాలి. కిటికీ లేకుండా సింహద్వారం ఉండ కూడదు. డోర్ కనుక మధ్యలో ఉంటే ఈ డోర్ కు ఇరు వైపులా తప్పనిసరిగా కిటికీలు ఉండాలి. సింహద్వారం మిగిలిన ద్వారాల కన్నా ఎత్తులో మరియు వెడల్పు లో ఎంతో కొంత పెద్దగా ఉండాలి. సింహా ద్వారాన్ని మించిన కొలతతో లోపలి దర్వాజాలు ఉండకూడదు. దర్వాజాలకు ఎదురుగా దర్వాజా ఉండుట మంచిది. అలా ఉంచలేని పక్షం లో కనీసం కిటికీని  అయినా ఉంచాలి. దర్వాజాలకు ఎదురుగా బోర్ లు బావులు, సెప్టిక్ ట్యాంక్ లు ఉండరాదు. దర్వాజాలకు ఎదురుగా పిల్లర్ కూడా ఉండరాదు. ఇటువంటి జాగ్రత్తలు తప్పనిసరిగా తీసుకోవాలి.

దర్వాజలు కిటికీ లు ఒకే రకమైన కలప తో చేయించుట మంచిది. లేదా 2 రకాలైన కలపతో అయినా ఫరవాలేదు. అంతేకాని 2 రకాలకన్నా ఎక్కువ జాతి తో కలప ఉండకూడదు. వేప కలప వాడినట్లైతే గడప మాత్రం వేరే కలపతో ఉండాలి. గడపకు వేప కలప వాడకూడదు. ఇంటికి వాడే కలప బాగా ఆరుదల కట్టే అయి ఉండాలి. పచ్చి కట్టే వాడ కూడదు. పాత కలప, పుచ్చిపోయిన కలప వాడరాదు. దర్వాజాలను తొర్రలున్న కట్టేతో చేయించరాదు. పిడుగు పడిన గృహ కలపను నూతన గృహానికి వినియోగించరాదు.

దర్వాజాలు అమర్చే సందర్భంలో తప్పనిసరిగా వాస్తు పండితుని సలహా అవసరం.  అన్నీ జాగ్రత్తలు తీసుకొని దర్వాజాలు అమర్చాలి. మంచి దిశకు ఉన్న దర్వాజ మంచి ఫలితాన్ని అందిస్తుంది. దర్వాజాకు ఎదురుగా చెట్లు కానీ నీటిప్రవాహపు పోటు గానీ ఉండరాదు. దర్వాజా సెంటర్ నందు ఆలయాల నీడ లేదా ధ్వజ స్తంభం ఉండకూడదు. ఆలయం ఉండకూడదు. దర్వాజులు వేసేటప్పుడు గాని తీసే తప్పుడు గాని భయంకరమైన ధ్వనులు రాకూడదు. దర్వాజలపై క్రూర మృగాల బొమ్మలు ఉంచరాదు. దర్వాజాలకు ఎదురుగా మెట్లు ఉండకూడదు. మరుగు దొడ్లు దర్వాజాకు ఎదురుగా రాకూడదు. గోడ మూలలు దర్వాజలో ఉండరాదు. ఈ విధంగా దర్వాజా లు అన్నీ జాగ్రత్తలు తీసుకొని అమర్చితే మంచి లాభం కలుగుతుంది.

సూర్యదేవర వేణుగోపాల్   M .A  (జ్యోతిష్యం)   సుందరయ్య నగర్   మధిర    ఖమ్మం జిల్లా